रुसले युक्रेनमाथि एकैदिन ४७७ ड्रोन र ६० क्षेप्यास्त्र प्रहार गरेको दाबी

काठमाडौँ । रुसले युक्रेनमा सबैभन्दा ठूलो हवाई आक्रमण गरेको छ । गएराती रुसले ४७७ ड्रोन र ६० क्षेप्यास्त्र सहित ५३७ क्षेप्यास्त्र आक्रमण गरेको युक्रेनले जानकारी दिएको छ । रुसले युक्रेनमा एम/केएन-२३ ब्यालिस्टिक मिसाइल, ३३ केएच-१०१/इस्केन्डर-के क्रूज मिसाइल र ४ क्यालिबर क्रूज मिसाइल पनि प्रहार गरेको युक्रेनको रक्षा मन्त्रालयले बताएको छ ।

युक्रेनी वायुसेनाले यी मध्ये ४७५ आक्रमणलाई रोकेको  र यस क्रममा युक्रेनका एफ-१६ पाइलटको मृत्यु जनाएको छ । मिडिया रिपोर्टका अनुसार, रुसी आक्रमणको जवाफ दिने क्रममा एफ-१६ मा मिसाइल लागेको बताइएको छ ।

रुसी आक्रमणमा घर र पूर्वाधारमा क्षति पुगेको छ र छ जना घाइते भएका छन् । युक्रेनी वायुसेनाले रुसको मिसाइल आक्रमणको क्रममा पाइलटले सात क्षेप्यास्त्र प्रहार गरेको बताएको छ, तर अन्तिम लक्ष्यमा प्रहार गर्दा उनको विमानले काम गर्न नसकेको बताएको छ ।

पाइलटले एफ-१६ लाई जनघनत्व भएको क्षेत्रबाट टाढा लगेपनि आफु समयमै विमानबाट बाहिर निस्कन नसकेको रक्षा मन्त्रालयले बताएको छ ।

यसअघि, युक्रेनले जुन २८ को बिहान रूसले कब्जा गरेको क्रिमियामा रहेको किरोभस्के एयरबेसमा आक्रमण गरेको दाबी गरेको थियो । किभ इन्डिपेन्डेन्टका अनुसार, यस आक्रमणमा रूसको एमआई-८, एमआइ-२६ र एमआई-२८ आक्रमण हेलिकप्टर र एक हवाई सुरक्षा प्रणाली नष्ट भएको दाबि गरिएको छ ।

युक्रेनी सुरक्षा सेवाले युक्रेनले रूसी विमान, वायु रक्षा प्रणाली, हतियार र ड्रोन भण्डारलाई लक्षित गरेको बताएको छ । यद्यपि, रूसले भने यसको पुष्टि गरेको छैन ।