आज दिनभरका प्रमुख २० समाचार बुलेटिन-ईराष्ट्रिय

काठमाडौँ । आज देश विदेशका प्रमुख २० समाचार यस प्रकार रहेका छन् ।

१- प्रधानमन्त्री केपी शर्मा ओलीले गृहजिल्ला झापामा रहेका छन् । प्रधानमन्त्री ओलीले झापाको बुद्धशान्ति गाउँपालिका, बुधबारेस्थित भागीरथा न्यौपाने बुद्धशान्ति अस्पताल र इलामको माई  नगरपालिकाको शितलीमा १५ शैय्याको आज उद्घाटन गरेका छन् ।

२- मधेश प्रदेश सभामा आगामी आर्थिक वर्ष २०८२/८३ को बजेटमाथिको छलफल आजपनि विपक्षी दलहरुले अवरोध गरेका छन् । शनिबार बसेको बैठक पनि विपक्षी दलहरुले बहिष्कार गरेपछि बजेटमाथिको छलफल हुन नसकेको हो । असार २२ देखि प्रदेश सभाको बैठकहरू लगातार बसिरहे पनि विपक्षी दलहरूको अवरोधका कारण छैठौं पटक बैठक स्थगित भएको छ । विपक्षी दलहरूले बजेटमा बिचौलियाको प्रभाव रहेको र वितरण असमान भएको भन्दै पुनर्लेखनको माग गर्दै आएका छन् ।

३- नेकपा एकीकृत समाजवादीका सम्मानित नेता झलनाथ खनालले पूर्वराष्ट्रपति विद्या भण्डारी एमालेको राजनीतिमा फर्किनु सकारात्मक भएको टिप्पणी गरेका छन् । शनिबार चीनबाट फर्केपछि सञ्चारकर्मीसँग कुरा गर्दै नेता खनालले पूर्वराष्ट्रपति भण्डारी कम्युनिस्ट पार्टीहरूलाई एकताबद्ध बनाउने उद्देश्यले राजनीतिमा फर्किएको हो भने त्यसलाई सकारात्मक रूपमा लिनुपर्ने बताएका हुन् । नेता खनाल चिनियाँ कम्युनिष्ट पार्टी (सीपीसी) को निमन्त्रणामा बेइजिङमा आयोजित 'विश्व सभ्यता संवाद' मा सहभागी हुन असार २३ गते त्यसतर्फ प्रस्थान गरेका थिए ।

४- राष्ट्रिय प्रजातन्त्र पार्टी (राप्रपा) मा आन्तरिक विवाद बढेको छ । अध्यक्ष राजेन्द्र लिङ्देनले केहि दिनअघि पार्टीको अनुशासन समितिमा रोशन कार्कीलाई नियुक्त गरेका थिए भने सगुन लावतीलाई प्रवक्ताबाट हटाएपछि विवाद बढेको हो । यसअघि अनुशासन समितिको अध्यक्षमा नवराज सुवेदी रहेका थिए । सुवेदी हाल राजसंस्था फर्काउने जनान्दोलन समितिको संयोजक रहेका छन् । पार्टीका महामन्त्री धवलशम्शेर राणाले आफ्नो नेतृत्वमा अध्यक्ष लिङ्देनविरुद्ध मोर्चाबन्दी शुरु गरेका छन् ।   राणाको नक्सालस्थित सचिवालयमा भएको छलफलमा ५० भन्दा बढी केन्द्रीय सदस्य सहभागी रहेको दाबि गरिएको छ ।

५- असार २४ गते आएको भोटेकोशीको बाढी पछि अहिले पनि ९१ जना नेपाली  केरुङमै रहेका छन् । जिल्ला प्रशासन कार्यालय रसुवाले उनीहरुलाई नेपाल ल्याउन गृह मन्त्रालय र परराष्ट्र मन्त्रालयमार्फत कूटनीतिक पहल थालिएको बताएपनि अहिलेसम्म उनीहरुलाई ल्याउने विषयमा ठोस पहल भएको पाइएको छैन । केरुङमा रहेका ९१ जना नेपाली नागरिकहरुलाई चिनीयाँ पक्षबाट केरुङमा खान, बस्न, औषधिपचार र अन्य आवश्यक प्रबन्ध सहित सुरक्षित अवस्थामा राखिएको जानकारी चिनीयाँ पक्षले जानकारी दिएको जिल्ला प्रशासन कार्यालय रसुवाले जानकारी दिएको छ । 

६- गल्छी-सितापाइला सडक हुँदै काठमाडौं आइरहेको कारमा आगो लागेको छ । शनिबार बिहान काठमाडौंको नागार्जुन नगरपालिका-८ भीमढुंगास्थित खड्का मोडमा बा.प्र ०१-०३१ च ०९६६ नम्बरको कारमा आगलागी भएको हो । प्रहरीका अनुसार कारमा आगो लागेर पूर्ण रूपमा क्षतिग्रस्त भएको छ । कारमा लागेको आगो दमकलको सहायताले नियन्त्रणमा लिइएको थियो । कार चालक काठमाडौंको लाजिम्पाटका सुरेश श्रेष्ठ र कारमा सवार अर्को एक जनाको सकुशल उद्धार गरिएको थियो ।

७- बैतडीको जयपृथ्बी राजमार्गअन्तर्गतको बझाङ-बैतडी सडक खण्ड पुर्ण रुपमा अवरुद्ध भएको छ । सुर्नया गाउँपालिका-७ नाचन्थलि स्थित जयपृथ्बी राजमार्गमा बझाङ-बैतडी सडकखण्डको भन्ज्याङ भन्ने स्थानमा सडक माथिबाट पहिरो आएपछि सडक पुर्ण रुपमा अवरुद्ध भएको हो ।

८- नेपालको अग्रणी नबिल बैंकले स्थापनाको ४१औँ वर्ष पूरा गरी ४२ औँ वर्षमा प्रवेश गरेको छ । सन् १९८४ मा स्थापना भएको बैंकले नेपालको वित्तीय क्षेत्रको आधुनिकीकरण, डिजिटल प्रविधिको उपयोग र मुलुकको आर्थिक वृद्धिमा उल्लेखनीय भूमिका निर्वाह गर्दै आएको छ ।बैंकले आफ्नो सेवा र उत्पादनलाई ग्राहक केन्द्रित बनाउँदै आज नेपालको पहिलो नम्बरको बैंकका रुपमा आफूलाई स्थापित गरेको छ । बैंकले वित्तीय सेवा मात्र नभइ समाज र वातावरणमै सकारात्मक प्रभाव पार्ने दिगो बैंकिङलाई पनि प्राथमिकता दिँदै आएको छ ।

९- भारतको अहमदाबाद विमान दुर्घटनाको प्रारम्भिक रिपोर्टमाथि एयरलाइन पाइलट एसोसिएसन अफ इन्डियाले अनुसन्धानको विधिमाथि चिन्ता व्यक्त गरेको छ । एसोसियसनले विज्ञप्तिमा, योग्य व्यक्तिहरूलाई अनुसन्धानमा समावेश नगरिएको आरोप लगाउदै रिपोर्टप्रति चिन्ता व्यक्त गरेको हो । एसोसियसनका अध्यक्ष क्याप्टेन साम थोमसले भनेका छन्- 'हामीलाई लाग्छ, यो अनुसन्धान पाइलटहरूलाई दोषी ठानेर गरिएको छ र हामी यो सोचाइमा आपत्ति जनाउँछौं ।'

१०- गत महिना भएको एयर इन्डियाको विमान दुर्घटनाको प्रारम्भिक अनुसन्धान प्रतिवेदन बाहिर आएको छ । यो प्रतिवेदनले विमान दुर्घटनाको मुख्य कारणहरूमाथि प्रकाश पारेको छ । यो प्रतिवेदन भारतको विमान दुर्घटना अनुसन्धान ब्यूरोले जारी गरेको छ । प्रतिवेदन अनुसार, विमानको इन्जिन बन्द गर्ने दुवै इन्धन नियन्त्रण स्विचहरू विमान उड्ने बित्तिकै 'कट-अफ' को स्थितिमा राखिएको थियो । ककपिटको आवाज रेकर्डिङमा, एक पाइलटले अर्कोलाई सोध्छन्- 'कट-अफ' किन गरेको ? जवाफमा, अर्को पाइलट भन्छन्- मैले गरेको होइन । रिपोर्टमा कुन आवाज कुन पाइलटको हो भन्ने कुरा स्पष्ट नभएको बताइएको छ ।

११- दक्षिण कोरिया, अमेरिका र जापानले संयुक्त हवाई अभ्यास गरेका छन् । यो अभ्यास शुक्रबार अन्तर्राष्ट्रिय क्षेत्रमा गरिएको थियो । उत्तर कोरियाविरुद्ध शक्ति प्रदर्शन गर्न अमेरिकी बी-५२ रणनीतिक बमवर्षक लडाकु विमान अभ्यासमा सामेल भए । यति मात्र होइन, तीन देशका शीर्ष सैन्य अधिकारीहरूले उत्तर कोरियालाई क्षेत्रीय सुरक्षामा खतरा हुने गतिविधिहरू बन्द गर्न पनि आग्रह गरेका छन् । उत्तर कोरियाको सीमा नजिकको अभ्यास यस्तो समयमा भएको हो, जब रूसी विदेशमन्त्री सर्गेई लाभरोभ उत्तर कोरिया पुगेका छन् । यसले उत्तर कोरिया र रूसलाई उत्तेजित पार्न सक्ने विश्लेषण भइरहेको छ ।

१२- म्यानमारको सागाइङ क्षेत्रमा रहेको एक बौद्ध गुम्बामा भएको हवाई आक्रमणमा २३ जनाको मृत्यु भएको छ । नजिकैका गाउँहरूबाट १५० भन्दा बढी मानिसहरू शरण लिन गुम्बामा आएको अवस्थामा आक्रमण भएको थियो । आक्रमणमा ३० जना घाइते भएका छन्, जसमध्ये १० जनाको अवस्था गम्भीर रहेको बताइएको छ । मृत्यु हुनेमा चार बालबालिका पनि छन् । मिडिया रिपोर्टका अनुसार बिहान करिब १ बजे गाउँको गुम्बामा जेट फाइटरले बम खसालेको थियो ।

१३- निर्देशक रुपेश तामाङले अभिनेत्री पूजा शर्मालाई मुख्य भूमिकामा लिएर निर्माण गर्न लागेको फिल्मको नाम ‘एक्का तीन’ राखिएको छ । शुक्रबार फिल्मको थिम पोष्टर सार्बजनिक गर्दै फिल्मको नाम सार्बजनिक गरिएको हो । रुपेशले पूजालाई दुई महिनाअघि उनको जन्मदिनको दिन फिल्ममा अनुबन्धित गरेका थिए । आर्टिफिसियल इन्टेलिजेन्स (एआइ) बाट बनाइएको थिम पोस्टर हेर्दा फिल्म एक्सन प्रधान हुने अनुमान गर्न सकिन्छ ।

१४- कमेडियन खड्गबहादुर पुन ‘खबपु’ को मुख्य भूमिका रहेको फिल्म ‘चिट्ठी’को प्रदर्शन मिति तय गरिएको छ । निर्माण पक्षले आगामी भदौ २० गतेबाट फिल्म प्रदर्शनमा आउने जानकारी गराएको हो । कुवेर सिने डिस्ट्रीब्युसनले फिल्मलाई देशभर वितरण गर्नेछ । 

१५- बलिउड अभिनेता सनी देओलले आफ्नो आगामी फिल्म बोर्डर- २ को छायांकन सकेका छन् । सनीले सामाजिक सञ्जालमा आर्मी पोशाकमा आफ्नो तस्बिर सेयर गरेर फिल्ममा आफ्नो भूमिकाको सुटिंग सकेको जानकारी दिएका हुन् । बलिउड अभिनेता सनी देओलले आफ्नो अर्को एक्सन फिल्म बोर्डर- २ को छायांकन पूरा गरेका हुन् । 

१६- अखिल नेपाल फुटबल संघ (एन्फा) ले विश्व फुटबल महासंघ (फिफा) ले नेपालमाथि लगाएको ‘कन्ट्रोल फन्डिङ’को बन्देज हटाएको जानकारी दिएको छ । फिफाले मार्च १५, २०२१ मा अखिल नेपाल फुटबल संघ (एन्फा) मा  आर्थिक अपारदर्शिताको आशंका गर्दै ‘कन्ट्रोल फन्डिङ’ लागू गरेको थियो । जसअन्तर्गत फिफाले एन्फालाई दिँदै आएको आर्थिक सहयोगलाई आफ्नो नियन्त्रणमा राखेर खर्च गर्न दिने गरेको थियो । चार वर्षपछि गत बिहीबार फिफाको गभर्नेन्स, अडिट एन्ड कम्प्लायन्स कमिटी (जएसीसी) को बैठकले नेपालमाथि लगाइएको ‘कन्ट्रोल फन्डिङ’को बन्देज हटाएको एन्फाले जानकारी दिएको छ ।

१७- यस बर्षको विम्बल्डनको पुरुष सिंगल्सको फाइनलमा इटालीका जानिक सिनर र स्पेनका कार्लोस अल्काराज भिड्ने भएका छन् । सिनरले जोकोभिचलाई तीन सेटमा पराजित गरेर फाइनलमा पुगेका हुन् । उनले ६-३, ६-३ र ६-४ को सेटमा जित हासिल गरेका हुन् । २३ बर्षिय सिनर पहिलो पटक विम्बल्डनको फाइनलमा पुगेका हुन् । उनले अहिलेसम्म तीन ग्राण्ड सलाम जितेका छन् । सिनरले २०२४ र २०२५ को अस्ट्रेलियन ओपन जितेका थिए भने २०२४ मा युएस ओपन जितेका थिए । अब सिनरले फाइनलमा स्पेनका स्पेनका कार्लोस अल्काराजसँग उपाधिका लागि खेल्ने छन् । अल्काराजले अमेरिकाका टेलर फ्रिट्जलाई चार सेटमा पराजित गर्दै फाइनलमा पुगेका हुन् । अल्काराजले ६-४, ५-७, ६-३ र ७-६ (८-६) को सेटमा जित हासिल गरेका थिए । अल्काराजले पछिल्लो दुई विम्बल्डन सिंगल्स लगातार जितेका छन् । 

१८- स्पेन र इटाली जारी महिला युरो कप फुटबलको क्वाटरफाइनलमा पुगेका छन् । समुह बी बाट स्पेन आफ्ना तिनै खेल जितेर समुह विजेता हुदै क्वाटरफाइनलमा पुगेको छ भने इटाली उपविजेता हुदै क्वाटरफाइनलमा पुगेको छ । यस समुहबाट बेल्जियम र पोर्चुगल बाहिरिएका छन् । अब क्वाटरफाइनलमा स्पेनले स्वीजरल्याण्डको सामना गर्ने छ भने नर्वेले इटालीको सामना गर्ने भएको छ । 

१९- एसीसी यू-१६ इष्ट जोन कप जित्ने नेपाली टिमका प्रमुख सदस्य सुशील रावललाई सुदूरपश्चिम रोयल्सले एक लाख सहयोग गरेको छ । एनपीएल फ्रेन्चाईजी सुदूरपश्चिमले एसीसी यू-१६ इष्ट जोन कप प्रतियोगितामा उत्कृष्ट प्रदर्शन गरेका सुशीललाई एक लाख सहयोग गरेको हो । सुदूरपश्चिम रोयल्सका सिइओ प्रकाश खड्काले सुशीललाई एक लाख नगद हस्तान्तरण गरेका छन् ।

२०- नेदरल्याण्डस र इटाली आइसीसी पुरुष टी-२० विश्वकपमा छनौट भएका छन् । युरोप छनौट अन्तर्गत नेदरल्याण्डस र इटाली विजेता र उपविजेता हुदै विश्वकपमा छनौट भएका हुन् ।